故事要由一個字講起：「貓」。

如果你有留意開 BeerMood，一定認得嗰隻圓碌碌、頂住成頭啤酒泡嘅橙色貓仔—由 Logo、主視覺，甚至門票上面，都見到佢嘅身影。但你有冇諗過，點解偏偏係「貓」，而唔係啤酒杯、啤酒花，或者其他更「穩陣」嘅選擇？

答案，其實就藏喺廣東話入面。

香港人形容一個人飲醉，會講「醉貓」，或者更地道嘅一句——「飲到貓咗」。呢個講法喺廣東話流傳咗好耐，根本就係我哋由細聽到大嘅蒲吧日常。對我哋嚟講，呢隻看似簡單嘅「貓」，正正代表住飲啤酒嗰種微醺同放鬆嘅好心情。

呢個概念同 BeerMood 嘅名字不謀而合——啤酒配合你每一種心情，任何時候都值得飲返杯。揀「貓」做主角，除咗因為貓人見人愛，更加係想話畀大家知：BeerMood 由第一日開始，就係一個土生土長、講廣東話嘅香港本土品牌。

由概念到畫面

有咗呢個概念之後，下一步就係搵啱嘅人，將佢變成大家眼前嘅畫面。我哋好榮幸邀請到香港本地人氣插畫師 Jane Lee（Messy Desk）親自操刀，設計 BeerMood 嘅 Logo、Key Visual 同埋所有貓仔視覺元素。
Jane 嘅畫風一向以用色鮮明、細節豐富同埋溫暖幽默見稱。呢種風格同 BeerMood 想帶畀大家嘅感覺完全一致：熱鬧、親切，仲帶住少少微醺嘅快樂。由主視覺入面一班喺維港天際線下暢飲嘅貓仔，到門票上面嗰隻招牌貓，全部都出自 Jane 嘅手筆。

下次見到呢隻貓，記得佢背後嘅故事

下次當你喺門票、Instagram 或者活動現場見到 BeerMood 呢隻貓，記得佢絕對唔止係得意咁簡單。佢背後載住廣東話文化嘅幽默、香港人嘅生活智慧，仲有一位本土插畫師嘅心血。

呢個，就係屬於我哋「醉貓」嘅由來。